_ مها أنا عايز اتجوز عليكي ، أفتكر الشرع مديني الحق اتجوز ارب..
= متكملش يا حبيبي دا حقك يا سامح انت بتبرر إيه بس
_ يعني انتي مش متضايقة ؟
= بص هو انا في موقف زي دا المفروض اقولك اللي خدته القرعة تاخده ام شعر وبتاع بس انا مؤدبة مينفعش أقول كدا وكمان القرعة دي تبقى أمك مش انا
_ يا حبيبتي يا مها ، مش غيرانة بجد ؟
= يا واد اغير من إيه يا عبيط دا شرع ربنا ، هتفضل طول عمرك عبيط وبريالة كدا
_ هو انا حاسس انك بتهزأيني بس قشطة يعني
= أهزأك ايه بس انا بوصفك ، هو انت لما بتشوف كلب في الشارع بتقوله إيه ؟ بتقوله يا باشمهندس ؟
_ لا بقوله يا كلب
= بيقفش أو بيحس بإهانة ؟
_ لأ خالص
= طيب ، مع إن الكلب عنده وفاء
_ ما انا كمان عندي وفاء ، العروسة الجديدة اسمها وفاء ، شوفتي التويست ؟
= ياغتي ، هتتجوز واحدة اسمها وفاء ، صحيح كل واحد بيدور على اللي ناقصه ، يالا ربنا يسعدكم
_ انتي طلعتي طيبة أوي يا مها ، بجد انا مكنتش متوقع كدا منك خالص
= من يومي يا واد بس انت اللي قليل الأصل سيكا ، بس حبيبي برضو ، المهم قول لوفاء متسميش الأكونت بتاعها زوجي قرة عيني بقى انا حاجزة الإسم دا من 10 سنين
_ لا هي الأكونت بتاعها اسمه ...
= رحيق البنفسج
_ إيه دا انتي عرفتي منين
= هو انا بتاعة بطاطا يا سامح ، انا عارفة كل حاجة يا حبيبي ، ربنا يهنيكم يا رب ، شيلها في عينك بقى دي بنت ناس برضو
_ أكيد
= واعدل يا سامح ، اتقي الله يا حبيبي انت مش ناقص ذنوب ، انت كدا كدا داخل جهنم في المكيف
_ أكيد يا حبيبتي طبعا هعدل يعني
= خد بقى البوكس دا ، انت رجعت لورا ليه مش هضربك ، دا بوكس فيه هدية جوازكم
_ لا بقى انا مش مصدق نفسي ، لسه فيه ستات عاقلة كدا
= يا حبيبي من يومي بقولك انت اللي قليل الأصل بس فمش فاكر ، طب اقولك ، احنا متجوزين بقالنا كام سنة
_ عشر سنين
= اتخانقنا فيهم كام خناقة ؟
_ كتير جدا
= عمري رديت عليك كلمة وللا طلعلي صوت في خناقة ؟
_ الشهادة لله لا يا حبيبتي ، طول عمرك ساكتة
= شوفت ، ومع ذلك رايح تجيبلي ضرة ، واطي يا روح قلبي بقولك ، يالا بارك الله لكما وبارك عليكما وجمع بينكما في خير
_ حبيبتي يا مها والله
= البوكس دا بقى مش ليك ، دا هديتي لضرتي حبيبة قلبي اللي خطفت جوزي ابو ريالة من عياله ومراته
_ بجد ؟
= طبعا ، إفتح بقى عشان تعرف محتويات الهدية
_ إيه دي يا مها ؟
= اه الفلاشاية السودا دي ، هقولك ، اصل انا كنت مسجلة كل خناقاتنا من يوم ما اتجوزتني لحد النهارده ، كل ما اشم ريحة خناقة في البيت افتح موبايلي واشغل الريكوردر واسيبك بقى تطلع أوسخ ما فيك وما اردش عليك خالص
_ انتي بتهزري صح ؟
= لا يا حبيبي والله بتكلم جد ، دا فيه ريكوردات هنا اللي هيسمعها هيقلع اللي في رجله ويقطعه على قفاك ، عربجي بيتخانق مع الفرسة بتاعته ، مش زوج محترم بيتخانق مع مراته
_ اممممم ، والفلاشاية البينك ؟
= دي الدلع كله بقى ، دي عليها ملف الخيانات بتاعك كله ، مكالمات وصور وڤيديوهات أحيانا واكتر من 3000 اسكرين شوت ، صاحاباتك بقى في الشغل على بنت خالتك المتطلقة على صاحاباتي اللي كنت بتخوني معاهم يا راجل دا انت اول إنسان اعرفه في حياتي يمشي مع عمته ، دا انت قذر
_ كل دا على الفلاشة ؟
= كله هنا ، حتى فيه مكالمة ظريفة كدا مع أيمن صاحبك وانت بتقوله وحشتني يا عمري انا قصيت منها الجملة دي بس ، هتدي إيحاء لطيف أوي للي هيسمعها
_ والفلاشاية الزرقا دي بتاعة ايه
= لا دي معليهاش حاجات مهمة ، دي عليها حقيقتك اللي جوا البيت بقى ، يعني ڤيديوهات ليك وانت بتاكل بطريقة مقرفة وبتعمل صوت زي الجمل ، تسجيلات كتير وانا بتخانق معاك عشان مبتشدش السيفون بعد ما بتعمل حمام ، شوية صور ليك وانت نايم شبه البطريق الحامل ، وحوالي 16 ساعة شخير من بتاعك اللي يصحي الميتين دا
_ فيه فلاشة لونها بنفسجي كمان
= اه دي بتاعة خناقات المصاريف والمصايف والهدوم الشتوي والحاجات دي
_ دا بوكس فضايح يا مها
= دا الصندوق الاسود بتاعك يا روح قلبي ، انا عايشة معاك بقالي عشر سنين ، لو مكانتش كل الفضايح دي تبقى معايه انا تبقى مع مين يعني
_ انا حاسس اني متجوز مرتضى منصور
= آديك هتتجوز وفاء عامر اهو زعلان ليه بقى ، ايه رأيك يا حبيبي ، تفتكر لما عروسة الغفلة تشوف البلاوي دي ، هتتجوزك على نيلة إيه
_ انتي بجد ناوية تبعتيلها البوكس دا
= لا طبعا هو انا ناقصة زيك
_ انا برضو بقول دي مش أخلاقك
= انا بفكر اعمل صفحة ممولة على الفيس بوك ارفع عليها الماتيريال دي ، عشان نخلص بقى من حكاية الجواز دي للأبد
_ مها يا حبيبتي طبعا انتي عارفة ان حكاية التعدد دي رخصة ربنا ادهالنا بس مش لازم نستعملها يعني
= حاسب تخبط حاجة بس وانت راجع بضهرك.
بقلم/دافنشي...........