من التفسيرات العجيبة للعبارة الشهيرة
ابوك السقا مات (بغض النظر عن انها اتعملت فيلم لانها عبارة دارجة من زمان جدا )
قصة سمعتها وانا صغير وهي تشبه الاساطير : إن رجل يعمل سقا في احد الضواحي ، وكان سهران علي النيل فعطش وقام شرب من النيل مباشرة ، وروح ونام ولما صحي من النوم حس انه نشيط وعفي بزيادة ، ولما حمل القربة بعد ما ملاها رفعها وكأنها ريشة ، فخاف انه يكون اصابه مس من الجن وراح لاحد كبار السن عشان يقرأ عليه ويطلع العفريت من جسمه لانه خايف يأذي حد
المهم الشيخ قعد يقرأ عليه ومحصلش اي حاجة فسأله : احكيلي عن اليوم اللي قبل ما تشعر بالتغير ده ...
المهم حكاله ، فقال له الرجل : انت شربت من المية وهي نايمة !
طبعا العبارة دي محتاجة شرح ...
كان بيعتقد بعض الناس ان مياه الانهار لها ساعة تنام فيها كل عام ، من صادف هذه الساعة وشرب من الماء تصبح قوته خارقة ..
سمع السقا الكلام ورضي بنصيبه وتحاشي نهائي انه يتعامل مع اي حد بأيده خوفا ان يقتله من غير ما يشعر ... اتجوز السقا اربع نساء وخلف منهم 20 بنت ، وكان نفسه في ولد فجاء اخيرا .. لكنه كان ضعيف ومريض ومع ذلك كان ابوه السقا بيحبه جدا وبيخاف عليه بزيادة ، وفي يوم بيلعب مع الاولاد في الحارة فضربه ابن فتوة الحارة ، وكان ده في مجيئ ابوه السقا فشاف اللي حصل واندفع نحو تجمع العيال وشال ابن كبير الحارة من فوق ابنه ونهره بغليظ العبارات ... فما كان من الولد الا انه راح واشتكي لأبوه فجاء فتوة الحارة مع نفر من اصدقاءه ووقفوا عند بيت السقا عشان يهينوه ... المهم بعد ما استفزوه جدا طلع كسر عضمهم كلهم والجميع حصلهم عاهات مستديمة ... ومن وقتها والناس خافت منه وعملوا له الف حساب هو وابنه .....
وبعد مرور سنة تقريبا دخلوا عشان يصحوا السقا وجدوه فارق الحياة .... فالعيال اول ما عرفت وقفوا علي باب بيت السقا يعيروا ابنه ويقولوا له : ابوك السقا مات ... يعني اللي كان بيحميك مات ومحدش هيقدر يمنعنا عن اذيتك ؟؟
😔
خلاصة القصة دي أن ابوك مهما كان وضعه هو السند والضهر ليك ولما بيموت ضهرك بيبقا مكشوف وممكن يتكسر للأبد🖤
ليست هناك تعليقات:
إرسال تعليق